Mae dyn oedrannus wedi marw yn dilyn tân mewn fflat ym Mae Cinmel.

Cafodd Gwasanaeth Tân ac Achub Gogledd Cymru eu galw i adroddiad o dân mewn eiddo ym Mhlas Foryd, Bae Cinmel am 13.55 o’r gloch heddiw (dydd Mawrth 18 Ionawr).

Anfonwyd dau beiriant tân, o'r Rhyl a Bae Colwyn, i'r digwyddiad. Cyrhaeddodd criwiau i ddarganfod difrod tân i’r eiddo a daethpwyd o hyd i gorff dyn oedrannus, y credir ei fod yn ei 80au, y tu mewn i’r fflat gan ddiffoddwyr tân.

Dywedodd Kevin Jones, Pennaeth Diogelwch Cymunedol gyda Gwasanaeth Tân ac Achub Gogledd Cymru: “Rydym yn cydymdeimlo’n ddwys â’r teulu ar yr adeg anodd hon.

“Bydd achos y tân yn destun ymchwiliad ar y cyd rhwng Gwasanaeth Tân ac Achub Gogledd Cymru a Heddlu Gogledd Cymru.”